Օրբելի կենտրոնը հյուրընկալել է Նորվեգիայի Թագավորության արտակարգ և լիազոր դեսպան տիկին Բերգլյոտ Հովլանդին։

Հանդիպման ընթացքում Օրբելի կենտրոնի ներկայացուցիչները ներկայացրել են կենտրոնի գործունեության հիմնական ուղղությունները, իրականացվող հետազոտական և վերլուծական ծրագրերը, ինչպես նաև կենտրոնի դերակատարումը տարածաշրջանային գործընթացների ուսումնասիրության և հանրային քաղաքականության ձևավորման համատեքստում։

Քննարկվել են Հարավային Կովկասին առնչվող մի շարք տարածաշրջանային հարցեր, առկա մարտահրավերներն ու զարգացման հեռանկարները։ Կողմերը մտքեր են փոխանակել նաև խաղաղության, անվտանգության և համագործակցության հնարավոր ձևաչափերի շուրջ։

Հանդիպման ընթացքում անդրադարձ է կատարվել նաև Օրբելի կենտրոնի և նորվեգական գործընկերների միջև հնարավոր համագործակցության ուղղություններին՝ ընդգծելով փորձի փոխանակման և համատեղ նախաձեռնությունների կարևորությունը։