Կրթություն
1991-1996թթ. սովորել է Երևանի պետական համալսարանի պատմության ֆակուլտետում, ապա ուսումը շարունակել է ՀՀ Գիտությունների ազգային ակադեմիայի պատմության ինստիտուտի ասպիրանտուրայում։
Մասնագիտական գործունեություն
Աշխատանքային գործունեությունն սկսել է «Միր» միջպետական հեռուստառադիոընկերության հայկական մասնաճյուղում։ Այնուհետև զբաղեցրել է տարբեր պաշտոններ ՀՀ Նախագահի, հետագայում՝ ՀՀ Վարչապետի աշխատակազմի Հասարակայնության հետ կապերի և տեղեկատվության կենտրոնում՝ ներառյալ տնօրենի խորհրդականի և «Օրբելի» վերլուծական խմբի ղեկավարի պաշտոնները։ Համակարգել է «Օրբելի զրույց» հարցազրույցների և քննարկումների շարքը։
Հայաստանի հանրային ռադիոյի համար հեղինակել է հաղորդումներ Հայաստանի անկախության, հայկական և միջազգային մեդիայի մասին։ Հոդվածներ է գրել EVN Report, Mediamax, Media.am և այլ լրատվամիջոցների համար։
Դասախոսական գործունեություն
2016-2018թթ. դասավանդել է Բրյուսովի անվան հասարակագիտական համալսարանի Հասարակայնության հետ կապերի մագիստրոսական ծրագրում՝ կենտրոնանալով մեդիագրագիտության, լրատվամիջոցների իրավունքի և քարոզչության ուսումնասիրությունների վրա։
Համաժողովներ
Կազմակերպել և մասնակցել է միջազգային փորձագիտական համաժողովների ժողովրդագրության, հայ-հնդկական, հայ-իրանական, հայ-վրացական և հայ-ռուսական հարաբերությունների թեմաներով, ներկայացրել զեկույցներ։
Միջազգային վերապատրաստում
Մասնակցել է լրատվամիջոցների վերապատրաստման դասընթացների Հոլանդիայում և հասարակայնության հետ կապերի դասընթացների Շվեյցարիայում՝ ՆԱՏՕ-ի «Գործընկերություն հանուն խաղաղության» ծրագրի շրջանակներում։ Մասնակցել է հակամարտությունների ուսումնասիրության «Media Dialog» միջազգային նախագծին Թբիլիսիում (2019թ.) և Բեռլինում (2025թ.): Մասնակցել է համաժողովների Հնդկաստանում (Ջայպուր) և Հունգարիայում (Բուդապեշտի երկխոսություն)։
500-ից ավելի ռադիոհաղորդումների ու հոդվածների, 32 հեռուստահաղորդումների և 18 վավերագրական ֆիլմերի հեղինակ է։
